وہ میرے عہد کے قد آوروں میں سب سے بلند ۔وقاص جعفری

#وہ میرے عہد کے قد آوروں میں سب سے بلند
۔۔۔ ۔۔۔۔ ۔۔۔۔وقاص جعفری

یہ چھٹی جماعت کی بات ھے جب میں گورنمنٹ مسلم ماڈل ھائ اسکول ،لاھور کا طالب علم تھا ،مجھے تعین کے ساتھ اخبار اور دن کا یاد نہیں پڑتا ،مگر خبر غیر معمولی ضرور تھی،اخبار کے upper half پر سیاہ ماتمی رنگ غالب تھا اور reverse میں یہ سرخی نمایاں تھی
موت العالم–موت العالم
(عالم کی موت ایک جہان کی موت ھوتی ھے)
یہ سید ابوالاعلی مودودی سے ایک نو خیز ذہن کا پہلا تعارف تھا جسے تعارف ،تعلق نسبت اور عقیدت بننے میں ابھی نصف دھائ مزید درکار تھی –
اردو کے کہنہ مشق مگر قدرے غیر معروف شاعر سید انوار ظہور ی نے نجانے کس کیف کے عالم میں حضور ختمی المرتبت اور ان کے جانثار ساتھیوں کا تذکرہ یوں کیا ھے

ھم نےکس دور میں کھولی ھیں ظہور ی آنکھیں
ان کو دیکھا،نہ انہیں دیکھنے والا دیکھا

بلاشبہ یہ حسرت تو اپنے عالم پائیدار میں جاکر ھی پوری ھوگی کہ انسانیت کے کامل نمونوں (بایھم اقتدیتم،اھتدیتم) سے شرف ملاقات ھو مگر ھر عہد کے زندہ انسانوں کا تذکرہ کرنے والے ابھی زندہ ہیں،جو حضرت مسیح کے بقول کہتے تھے
اے مچھلیوں کے پکڑنے والو،آو ! میں تمہیں انسانوں کا پکڑنے والا بنا دوں یا پھر قاہرہ کی پرپیچ گلیوں اور پر رونق قہوہ خانوں میں سرگرداں حسن البنا کا یہ کہنا کہ “مجھےکتابیں نہیں انسانوں کو تصنیف کرنے میں زیادہ دلچسپی ھے”
محمد علی جناح اور علامہ محمد اقبال کو دور سے دیکھنے والے بھی شاید ھی انگلیوں پر گنے جائیں مگر ابھی وہ زندہ وجود اور خوبصورت نفوس موجود ہیں جنہوں نے براہ راست سید ابوالاعلی مودودی سے فیض حاصل کیا -ان سے ملکر معلوم ھوتا ھے کہ بڑا آدمی اور بڑا پن کس چیز کا نام ھے۔۔۔۔۔
وہ تو وہ ہیں ،تمہیں ھو جائے گی الفت مجھ سے
اک نظر تم مرا محبوب نظر تو دیکھو

سید ابوالاعلی مودودی کو اس دنیا سے گذر ے اگرچہ 40 سال بیت چکے ہیں مگر ،باتیں ان کی یاد رہیں گی ،دیر تلک سر دھنیے گا ،کے مصداق جب بھی مولانا کا تذکرہ چھڑے تو “لذیذ بود حکایت دراز تر گفتم” ھی عنوان ٹہرے-
تقریب تھی اسلامی جمعیت طلبہ کے ترجمان رسالہ “ھمقدم” کے سید ابوالاعلی مودودی نمبر کی پذیرائی کی،شرکا میں دو تین خوش نصیبوں کے سوا غالب اکثریت ان نوجوانوں کی تھی جن کے والدین نے بھی شائد مولانا محترم کو براہ راست نہ دیکھا ھو-میں اپنے آپ کو اتنا ‘خوش قلم’ نہیں پاتا کہ مولانا کے افکار و اثرات پر کوئ بات کرسکوں مگر میرے اردگرد مولانا کی وہ زندہ تصنیفات موجود ھیں جو بتاتی ہیں کہ بڑاآدمی،سچے الفاظ اور زندہ کردار کی اصطلاحات کن پر صادق آتی ہیں -مجیب الرحمان شامی ھوں کہ الطاف حسن قریشی،حفیظ اللہ نیازی ھوں کہ ھارون الرشید ،محمد عبدالشکور ھوں کہ لیاقت بلوچ۔۔۔۔۔۔تذکرہ ابوالاعلی ھو تو نہ جانے کہاں سے آنکھوں میں چمک اور لہجے میں کھنک اتر آتی ھے،میں نے مولانا کو ایک طالب علم کے طور پر پڑھا ھے (استاد و تلمیذ کا یہ سفر تاحال جاری ھے)،میں سمجھ سکتا ھوں کہ مولانا مودودی کو براہ راست سننے اور دیکھنے والوں پر کیا گزرتی ھوگی -مولانا محترم کی چند کتب ھی ھم انٹرمیڈیٹ اور گریجوایشن کے دوران پڑھ پائے(سمجھنے کا سفر ھنوز جاری ھے)،بھلا ھو اسلامی جمعیت طلبہ کے اجتماعی مطالعہ جات اور اسٹڈی سرکلز کا جس نے ان کتب کی سدھ بدھ ھمارے اندر پیدا کی -شہادت حق،بناو اور بگاڑ،زندگی بعد موت کا عقلی ثبوت،سلامتی کاراستہ،تحریک اسلامی کی اخلاقی بنیادیں ،جیسی مختصر تحریروں سے شروع ھونےوالا سفر مجھے مقدمہ تفہیم القرآن،پردہ،اسلامی تہذیب اور اس کے اصول ومبادی،معاشیات اسلام ،خلافت وملوکیت،اسلامی نظام زندگی اور اس کے بنیادی تصورات جیسی مربوط،مستند اور مدلل کتب تک لے آیا ۔ انہی دنوں یونیورسٹی کے ایک فاضل استاد کا کہا جانے والا یہ خوبصورت جملہ آج بھی میری سماعتوں میں محفوظ ھے کہ ” عصر حاضر میں مولانا مودودی سے بہتر عقل کو کلمہ شاید ہی کسی نے پڑھایا ھو”مولانا کا اصل کارنامہ یہی ھے کہ انہوں نے مرعوبیت اور انفعالیت کے دور میں اسلام کے جامع تصور کو روح عصر سے مطابقت (relevance) کا عنوان بنایا بلکہ یہ بھی طے کردیا کہ آنےوالے ھر عہد اور مستقبل کے ھر زمانے کو اسلام کے چشمہ صافی سے سیرابی کے بغیر کوئ چارہ نہیں-ایک ایسے عہد میں جب سوشلزم یہ دعوی کرتا کہ آسمان سے خدا اور زمیں سے سرمایہ داری کو نکال کر ھی دنیا امن پا سکتی ھے ، انہوں نے اپنے راسخ ایمان اور معجزنما علم الکلام سے سوشلزم اور قومیت دونوں زور آور قوتوں کو لگا میں ڈالیں-
مجھے اس اعتراف میں کوئ باک نہیں کہ مولانا مودودی کی تحریروں کو میں نے جمعیت طلبہ سے فراغت کے بعد اس وقت زیادہ پڑھا اور سمجھا جب مجھے خود ان موضوعات پر سرکلز کو کنڈکٹ کرنے کی ضرورت پیش آئ۔یہ بالکل فطری بھی ھے کہ درس و تدریس کے عمل میں انسان زیادہ سیکھتا ھے۔بڑے لوگوں کی تحریر کا یہ حسن ھوتا ھے کہ ھر بار جب آپ مطالعہ کرتے ہیں تو فہم وادراک کا کوئ نیا دریچہ وا ھونے لگتا ہے ،ذہن کے افق پر نئی بجلی کوندتی ھے اور مسائل حیات کو حل کرنے کی کوئ نئی کلید میسر آتی ھے۔
‏سفر کی فراغت کے چند لمحات میسر آتے ،مولانا سید ابوالاعلی مودودی سے اکتساب کرنے والوں کی خدمت میں کچھ جسارت کرنے کی ھمت موجود پاتاا ھوں ،بلاشبہ اس کے مخاطبین میں،میں خود بھی شامل ھوں

‏1-احمد جاوید صاحب کا یہ کہنا بہت خوب اور بر محل ھے کہ “اگر آپ کسی پر احسان کرنا چاھتے ہیں تو اسے سید مودودی سے روشناس کرادیں”۔اللہ تعالی مغفرت فرمائے البدر پبلی کیشنز/اسلامک پبلی کیشنز والے عبدالحفیظ احمد کی ،انہوں نے چند سال قبل “سید مودودی پڑھیے۔۔۔سید مودودی پڑھائیے”مہم شروع کی -ھمارے کاموں میں بڑا کام مولانا کو پڑھنا اور دوسروں کو ان کی فکر،لٹریچر تک رسائی دینا ھونا چاھییے- یہ کام ضابطے کی کاروائ سے کہیں بڑھ کر دل کی آمادگی اور احسان شناسی کے جذبہ سے ھو-مگر یہ اسی وقت ھوگا جب ھم خود سیدی محترم کو جانتے ھوں گے،جو ان کے لٹریچر کے بالاستیعاب مطالعہ کے بغیر ممکن نہیں۔ھماری نوجوان نسل، ملت کا سرمایہ اور امت کی نگہبان ھو سکتی ھے ،اسی صورت میں کہ ان کے ذہن و دل مسلمان ھوں -فکری اورعملی کشمکش میں مولانا نے اپنے عہد کے نوجوان کو سب سے زیادہ متاثر کیا-آج اسی نسل کو سب سے زیادہ مخاطب کرنے کی ضرورت ھے

‏2- مولانا نے اپنے وقت کی سب سے سہل زبان میں لکھا-معاصر مذھبی لٹریچر کا مطالعہ کرنے والا عالم ھی نہیں، عامی بھی گواھی دے گا کہ مولانا مودودی، دور جدید میں دینی لٹریچر کو ادبیت،چاشنی،سلاست اور روانی بخشنے والے علما میں سب سے آگے ھیں ،مگر یہ بھی حقیقت ھے کہ نئی نسل (جنریشن z) کے لئے یہ اردو زبان بھی مشکل سے مشکل تر ھوتی جارھی ھے-ان حالات کے مولانا چنداں ذمہ دار نہیں ،یہ ھماری تعلیم اورمعاشرت کا المیہ ،حالات کا جبر اور میڈیا کی یلغار ھے کہ ھم یہاں تک آن پہنچے ہیں ۔اس کے ساتھ ساتھ یہ بھی ایک حقیقت ھے کہ قرانی عربی کے علاوہ ھر زبان چند سو سال بعد اپنی ھئیت بہت حد تک تبدیل کرلیتی ھے-ایک طرف تو ضرورت اردو زبان کی حفاظت ،فروغ اور ترقی کی ھے، جس سے دوری میرے نزدیک اقبال،مودودی اور نسیم حجازی سے محرومی ھے-دوسری طرف مولانا مودودی کے لٹریچر کی قدرے آسان اور مختصر زبان (abridged version) میں فراھمی ھے ۔مغرب نے توارسطو سے لے کر شیکسپیئر تک اپنے سینکڑوں اور ہزاروں سال پرانے کلاسیکل لٹریچر کو اسکول کے طلبہ کے لئے قابل فہم اور readable بنادیا ھے ۔مجھے خوشی ھے کہ کہ ھمارے دوست شاھد وارثی اور ان کی ٹیم مولانا مودودی کی علحیدہ علحیدہ کتب کے learning outcomes پر تحقیق کر رھی ھے جہاں ھر کتاب اور مولانا کے فہم دین کا ھر پہلو ایک مرکزی خیال ،اس کے گرد اگر د ذیلی نکات کا web بناتا ھے،اللہ کرے یہ کام جلد تشنہ تکمیل ھو-

3- ھم شکر گذار ہیں ان افراد اور تنظیمات کے جو مولانا مودودی کی فکر اور لٹریچر کو مختلف فارمیٹ پر منتقل کررھے ہیں ،تاھم یہ سارا کام ایک مستقل جذبہ کے ساتھ ساتھ مربوط کاوش کا تقاضہ کرتا ھے -مولانا کا لٹریچر دنیا کی کئی زبانوں میں دستیاب ھے تاھم یہ بھی حقیقت ھے کہ تمام اھم زبانوں (بالخصوص عربی،انگریزی) میں ابھی بھی بہت کام کیا جانا باقی ھے -آج کے دور میں برانڈنگ اور مارکیٹنگ کا جادو سر چڑھ کر بول رھا ھے-سطحی ،مادی اور سفلی اشیا کو اس انڈسٹری نے انسانوں کی ضرورت بنادیا ھے ،آج مذھبیات بالخصوص مولانا کے لٹریچر کو جدید ،اچوتھے انداز میں پیش کرنے کی ضرورت ھے،اس لئے کہ فی زمانہ فکر کی گہرائی وگیرائ ،ظاھری حسن کی بھی متقاضی ھوتی ھے

‏4- ‏آج کے دور میں علم نے اپنی تحصیل کے لئے بے شمار راستے تخلیق کرلئے ھیں ،ان راستوں کی بھی نہ جانے کتنی شکلیں ہیں – سوشل میڈیا اور IT ٹیکنالوجی نوع بہ نوع شکلیں اختیا کررہی ھے ۔پاکستان کی 50 فیصد نوجوان نسل، اول تو کسی عالم دین کو recognise ھی نہیں کرتی ،دین سے تعلق رکھنےوالوں میں 3 فیصد سے بھی کم مولانا مودودی کو identify کرتے ہیں-نئی نسل کے نزدیک استاد،عالم،سکالر وہ ھے جو ان کی ٹچ اسکرین پر نمودار ھوسکے ،جو ان کی ایک کال پر اپنے علم کا پندار لئے سبسکرائبر کے ذاتی چینل پر حاضر ھو۔ٹوئیٹر،فیس بک نے مطالعہ کے محدود رجحان کو محدود تر کردیا ھے ،انسٹاگرام نے تصویر کو ھزار الفاظ
(a picture worth than thousand words)
‏ھی نہیں بلکہ تمام لغت ھائے حجازی پر غالب کردیا ھے۔مجھے اچھا لگتا ھے جب زبیر منصوری سورہ الکہف کو seven sleepers کے نام سے story telling کی تکنیک سے نئی نسل کو پڑھاتے ہیں-پنجاب یونیورسٹی کے پروفیسر ڈاکٹر اشتیاق گوندل نے خود اس ضرورت کو جان کر

Maulana Maudoodi Studies (MMS)
‏کے نام سے طلبہ وطالبات اور جدید تعلیم یافتہ ذہن کو QUIZES اور Q&A کے ذریعہ خط وکتابت کورسز کی تشکیل۔کے لئے کمر بستہ کردیا-ان دائروں کو مزید بڑھانے کی ضرورت ھے ،موبائل ایپلی کیشنز،گوگل سرچ ایبل آپشنز،پاور پوائنٹ پریزینٹیشنز،ای بکس حتی کہ موبائل گیمزوغیرہ
‏ کیا ھم نہیں جانتے کہ تعلیم کا جدید تصور، بہتر تدریس کی خاطر ابتدائ جماعتوں میں زبان (languages) سے لیکر ریاضی (Calculus) تک کے مضامین کو کمپیوٹر گیمز پر لے آیا ھے-

5-سید مودودی کی فکر جامد اور ساکت نہیں ،متحرک اور نمو پانے والی (organic )ھے ۔ایک طالب علم کے طور پر میں اس بات کا قائل ھوں کہ مولانا کی فکر سے فکر کے مزید سرچشمے پھوٹنے چاھییں ۔مولانا نے اسلامی کاز کی آبیاری کے لئے اسلاف سمیت رائج الوقت مناھج کے علی الرغم ایک مختلف راستہ اختیار کیا جس میں صحت مند تنقید (توصیف بھی) اور ردو اختیار کے تمام درکار آپشن کو بروئے کار لایا گیا- مولانا نے اسلاف کے صدیوں سے رائج طریقہ کار ( تحریر وتقریر/وعظ و تصنیف) سے آگے بڑھتے ھوئے دینی جدوجہد کے کچھ نئے سانچے (models & paradigm)اختیار کیے-کچھ نقادوں کے نزدیک یہ کہیں نیشنلزم اور کہیں سوشلزم سے اخذ کیے گئے تھے،حقیقت یہ ھے کہ “خذ ماصفا ودع ماکدر” کے اصول پر انہوں نے جدوجہد کی فکری تشکیل،انتظامی ڈھانچے اور حکمت عملی کی تراش خراش کے لئے تخلیقی اور موثر پیمانے اپنائے،جس میں حاضروموجود سے مرعوبیت کا عنصر نہ ھونے کے برابر تھا -سید مودودی نے بیسویں صدی کے وسط میں وقت کی جدید ترین (most modern) اسلامی تنظیم کی داغ بیل ڈالی -اس تنظیم کی فکری بنیادیں اسقدر مضبوط تھیں کہ زمانہ کے نشیب و فراز کے باوجود پون صدی سے یہ تنظیم انہی بنیادوں پر کھڑی ھے,یہ توایک مٹبت پہلو ھے -غورطلب امر یہ ھے کہ مولانا نے جس فتنہ اور سحر کو اس کے شایان شان جواب سے بکھیر کر رکھ دیا ،وہ تہذیب اپنی ادارتی ساختیات ،سماجیات، حرکیات اورسوچنے سمجھنے کی صلاحیت سے کہیں آگے جاچکی ھے- یقینا مغرب کے روحانی اضمحلال اور روزافزوں معاشی زوال کے لئے دور سے دلیل لانے کی ضرورت نہیں مگر کیا آنے والا کل ھمارا ھے ،مسلمان ممالک سے ابھی اس خوشخبری کا امکان نہیں-اس تناظر میں وہ لوگ خو مولانا کی فکر سے متاثر ہیں ،انہیں صرف سیاست نہیں بلکہ سماج،تعلیم ،ابلاغ،ثقافت سمیت ھر دائرے میں روایتی ڈگر سے ھٹ کر اور پامال راستوں سے اوپر آٹھ کر سوچنا ھوگا-

‏6- مولانا سید ابوالاعلی مودودی کی فکر اس لحاظ سے خوش قسمت ھے کہ اسے جماعت اسلامی جیسی منظم ،متحرک اور مخلص تنظیم کا جامہ ملا -فکر سید کےتسلسل،اشاعت اور فروغ میں جماعت کا کلیدی کردار ھے – مگر یہ بھی سوچنے کا ایک دائرہ ھے کہ کہیں اس اونرشپ اور ملکیتی سوچ(possessiveness) نے عام معاشرے کو سید مودودی سے دور تو نہیں کردیا – ھم ایک پولایرائزڈ معاشرے کے باسی ھیں جہاں لوگ لیبل اور برانڈ کو دیکھے،چکھے،برتے بغیر اپنی مخصوص رائے پر اصرار کرتے ہیں -جس معاشرے میں لوگ نماز کی ادائیگی اور بیکری مصنوعات کی خریداری تک،کسی ٹیگ کی بنیاد پر کریں ،وھاں اس بات کی ضرورت ھوتی ھے کہ عقیدے، عمل اور سماج کی اصلاح کے کچھ کام نیوٹرل انداز میں کیے جاتےرھیں -اس رائے سے اختلاف کیا جاسکتا ھے مگر اس پر سوچا تو جائے کہ مولانا مودودی کو کم از کم اسلام کی نشات ثانیہ کے معماروں میں سب کے لئے محبوب کیسے بنایا جائے -اسلامی سیاست مولانا کی فکر کا امتیاز اور شہ سرخی ضرور ھے مگرعقیدہ،تعلیم،خاندان، معیشت ،اور اصلاح معاشرہ کے ذیل میں مولانا کا کنٹری بیوشن بھی کم اھم نہیں-کچھ ادارے اور افراد اگر یک سو ھو کر اس کام پر بھی جت جائیں ، تو بھی یہ قوم،تحریک اور سید مودودی کی سراسر خدمت ھی ھوگی،ھمیں بہرحال اس کی گنجائش نکالنی چاھییے –


By | 2019-10-24T12:51:42+00:00 October 24th, 2019|articles, Latest News|0 Comments

Leave A Comment